Arabia Saudite shpreh gatishmëri për bashkëpunim ekonomik – Takim i Ministrit Durmishi me Zëvendësguvernatorin e GAFT\r\n\r\nNë kuadër të pjesëmarrjes në Forumin Ekonomik të Biznesit të mbajtur në Sarajevë, Ministri i Ekonomisë, z. Besar Durmishi, zhvilloi një takim bilateral me Shkëlqesinë e Tij, z. Abdulaziz Alsakran, Zëvendësguvernator për Marrëdhënie Ndërkombëtare në Autoritetin e Përgjithshëm për Tregtinë e Jashtme të Arabisë Saudite (GAFT).\r\nTakimi u zhvillua në një atmosferë bashkëpunuese dhe shënoi një hap të rëndësishëm drejt forcimit të marrëdhënieve ekonomike ndërmjet Republikës së Maqedonisë së Veriut dhe Mbretërisë së Arabisë Saudite. U konfirmua interesi reciprok për rritjen e shkëmbimit tregtar, i cili aktualisht qëndron në vlerën prej 44 milionë dollarësh, me synimin për ta tejkaluar këtë nivel përmes iniciativave të reja dhe investimeve strategjike.\r\nGjatë takimit, palët diskutuan për:\r\n• Organizimin e forumeve të përbashkëta të biznesit dhe vizita të ndërsjella të delegacioneve ekonomike;\r\n• Mundësitë për investime saudite në sektorë me prioritet të lartë për zhvillimin kombëtar, përfshirë agrokulturën, turizmin dhe projektet e qëndrueshme infrastrukturore;\r\n• Zhvillimin e Qendrës së Skijimit “Kodra e Diellit” në Tetovë, si një projekt emblemë për nxitjen e turizmit malor dhe zhvillimin e rajonit;\r\n• Mbështetjen për certifikimin Hallall të produkteve vendore, si një hap konkret për rritjen e eksporteve dhe diversifikimin e tregjeve të synuara.\r\nMinistri Durmishi theksoi se ekonomia e Maqedonisë së Veriut ka potencial të konsiderueshëm dhe me partnerë strategjikë si Arabia Saudite, ky potencial mund të shndërrohet në projekte konkrete që sjellin zhvillim, punësim dhe prosperitet për vendin.
